sa umaga,
ang bibig ay tanikala
ng mga salita
kawing-kawing na talinghaga
ng makinang nagluluwa
ng tiket sa paglalakbay,
tayutay ng buhay
ang maghintay at mag-abang
mga puspos ng paghangos
ang bigat ng bawat hakbang
at kung gabi,
mga paa'y iuunat
sa elipse ng pangarap,
hindi tuldok kundi kuwit
ang talunton ng paghikab;
ang antok ay tila batong
nakadagan sa talukap
dumuduro ang pagpikit
sa budhi ko at ulirat
sa istasyon,
bawat isa ay katulad
ng nagkalat na palito,
isiniksik, nagsalansan
ikinahon sa posporo,
nagpayao't nagparoon
nagparine't nagparito,
kapurula'y sungki-sungking
ikikiskis sa prinsipyo.
Walang komento:
Mag-post ng isang Komento