MORNING GLORY

Kanina,

ipinasilip sa akin ng

malalim na tulog ang

bintana ng pagtanda;

hindi na nga ako

bumabata, at ang edad

ay hindi papaurong,

parang totoo ang mga

panaginip; pira-piraso

ngunit singlinaw ng 

agos ng tubig

ang mga bagay,

kahit lagaslas ay

rumirindi sa pandinig;

nanuot sa pang-amoy

ang bango at bantot.

at ginising ako

ng hagod sa likod

nang banggitin ko

ang maraming pangalan

ng mga nanakit

at nang-iwan.

01/08/2023

ANG APOY SA KAMAY

 Pakiramdam ko'y 
nasa aking palad
ang kapangyarihan ng araw,
pinapaso ng daliri
ang makapal mong balat
ini-inin ang ugat sa likod,
sa braso, sa binti.
talampakan at noo.

Huwag ipagkamali
ang rahas at diin
ng mga daliri;
paggalugad ito
sa nagtatagong lamig,
pagsalat sa baradong ugat,
ang apoy sa kamay
ay alab ng ginhawa;
tinutupok ng haplos
ang pagpapagal; nang mabuhay
na mag-uli ang katawang lupa.

01/05/2023

SALIMUOT

 Nagmamapa ang gatla
sa lamukos na papel,
at salasalabid sa dibdib
ang mga buhol ng sinulid.

O, kay lupit 
nang umibig sa ulang nanalasa
sa panahon ng tagtuyot;
tumatawa lang ang lupa
sa halik ng mga patak.

Kumulapol ang putik
sa nagliligalig na puso.

01/04/2023

AQUARIUM

Maraming nalalambat
ang mga salita;
maliliit, malalaking isda
na napaniwala na may bagong
daigdig, lampas sa pag-ahon.

Ngunit mapanlinlang
ang mga dalisdis ng salaming
aquarium; de-kahon ang ligaya
at lumbay, artipisyal ang mabuhay
kaya't kahit anong sisid
sa kailaliman, namamatay pa ring
lutang, sa imbing kababawan
ng pahinga at pahinga.

01/03/2023

ANG BULAKLAK NG SAGING

Tiniba

ng magdamag na ulan

ang puno ng saging;

kasamang nalaglag sa lupa

ang puso nito,

at walang kamay

na nakasalo;

napakalungkot;

kung maaga lamang 

nagdeklara nang walang pasok

hindi sana nilalamon

ng panghihinayang,

ang binansot na pamumukadkad

ng mga bulaklak

sa nandarahas na ulan.

01/07/2023

ATRAS

Ngayo'y binibilang
ko na ang mga hakbang, 
hindi papalayo sayo
kundi papalapit sa akin.

Oo, sa akin,
pagkat mabigat ang 
yapak ng pagtakas
at 'di kinaya ng binti
ang bigat ng kaluluwa;
mantsa sa na lang sa alaala
ang mga nunal
sa talampakan; kaya pabalik
ang aking hakbang
nang makita ang mga mintis 
sa maagang pagtalilis.

01/02/2023

 

SA IKATLONG ARAW NG BAGONG TAON

 Nakapangyayari
hiwaga ng ihip
mula sa 'yong bibig

umampat ang sugat
humilam ang hapdi
natuyo ang langib.

Ngunit,
kay sarap kutkutin
at saka kalkalin
kiliti ng kati habang naghihilom;
kahit na magnaknak
bumalik ang sugat

kahit maimpeksyon.
hiwag ng ihip
mula sa 'yong bibig
ang magpapampat,
titikom sa labi 
ng alaala mong
nagpanganga ng sugat.

0/03/2022