"be wise like a serpent" - Jesus Christ
Hindi ngingiti
ang mga anghel
o hahalakhak si satanas
sa pagtuklaw ng ahas
sa aking braso;
mapanlinlang ang talino!
lason itong
namintog sa sugat
dumuro sa utak,
kamandag sa dugo
sumupil sa puso!
'sing talim ng dunong
tuklaw ng ulupong;
sagitsit ng lason
ay pumapatay,
dumudurog
sa moog at tugatog
ng kamangmangan!
may dangal ba
ang baluktot na katwiran?
pitpitin ang dila
ng nagdilang anghel,
gumanti ng halik
sa halik ni hudas,
saksakin sa likod
ang mapagkanulo,
dukutin ang mata
ng linsil at tuso!
anong dignidad
ang hindi mabalaho
kung ang utak
ay nasa tiyan
at ang bibig ay nasa bulsa!
tapalan ng kuwarta
mata ng hustisya;
tansong katotohanan,
tubog sa gintong
mapusyaw ang kinang;
hilaw na sinaing,
nilutong katarungang
kinulang sa inin!
hindi matutuwa
ang mga santo,
lalong hindi hahagalpak
ang mga diyablo!
sa tuklaw ng ahas
sa aking braso;
oras na magdeliryo
ang talino'y hahanapin
sa dulo ng gatilyo!
Base sa pagkakaintindi ko sa tula, ito ay tumatalakay sa talino ng isang tao na nababalutan o natatakpan ng maling pangangatwiran, nang dignidad na hindi makuha dahil sa ito ay nakatago, talino na hindi mahubog ng maayos o mailabas dahil sa iba't ibang aspeto ng buhay, talino na dahil sa dami ng bumabalot ay unti-unting nawawala at nilalason ng mga bagay bagay sa paligid nito. Sinasaad din dito na kung hindi man makita and dignidad, talino, hustisya, at katotohanan, sa huli ito ay matatagpuan sa dulo ng gatilyo na maaaring ibig sabihin ay maaaring makita sa marahas na paraan kaya sinasabi din dito na kailangan natin maging wais tulad ng isang ulupong o ahas na kung saan ay tahimik lang at nagmamasid ngunit mabangis tumuklaw o lumaban kung kinakailangan.
TumugonBurahin