SONETO SA TAG-ULAN

Nanunuot sa 'king balat ang lamig ng mga patak

nitong ulan kung bumuhos ay para bang mga sibat

sumisiksik sa kalamnan, sumusurot sa ulirat

ang kaligkig sa katawan ay kuryenteng 'di paawat.

Supilin mo ng 'yong yakap ang katawang giniginaw,

darangin mo sa 'yong init nang ang lamig ay malusaw,

pabayaang sa kandungan ay tuluyang mabalahaw

upusin sa pag-iinit nang ang lamig ay matunaw.

Kung tupukin at tuluyan na mag-alab ang katawan

at hindi na magpaawat ang katawang nadadarang

ay salamat sa pagbugso at lugso ng pagmamahal

yakap kitang basang-basa sa maapoy na tag-ulan!

ang tigatik ng tag-ulan na naghatid ng kaligkig,

ang s'ya ngayong nagpakilig sa puso kong umiibig.

10/20/2020

NANG KIT'LAN NILA NG BUHAY ANG ISANG KERUBIN

Nang kit'lan nila ng buhay

ang isang kerubin,

umiyak ng apoy ang langit;

lagablab ang ngitngit at galit

sa sulok - puso ng inang tumatangis.

Mailalarawan ba ang hapdi?

inang ikinarsel sa pangungulila

sa anak na hindi mayakap

sa bunsong hindi mahagkan;

ang pagkawalay ay porma

ng pagpatay,

ang malayo ay anyo

ng pagkatay

sa kerubing umuut-ot sa puklo

ng mainit na dibdib ni nanay.

Kaya, nang kit'lan nila

ng buhay ang kerubin,

umiyak na ng apoy ang langit,

tutupukin tibay ng dibdib

ng berdugo at ganid,

hindi nila unawa ang pag-ibig,

hindi nila batid kumukulong galit,

hindi nila tanto ang bagsik ng ngitngit;

balasik ng inang namatayan,

tapang ng babaeng

nagtatanggol sa bayan!

10/17/2020

"BISITA"

Kung binibihag ka

ng alas dose y media ng gabi
at nakaselda sa tapang

ng mainit na kape,
maitataboy ba ng hindi pagtulog
ang sumpang hilakbot ng mga bangungot?

Nakabuntot ang mga alalahanin
sa siwang ng nag-aabang na bukas,
tanghod ang mga tala
sa pinatay na pangarap,
luksa ang dilim na lumalatag
sa magdamag; nakapikit na bangkay
ang itim na mga ulap;
tumatabing sa pinagkait na langit
ng dustang kaluluwang
salagmak sa lupa.
 
Kung maitataboy ng  hindi pagtulog
ang sumpang hilakbot ng mga bangungot;
ilalapat ko ang bibig
sa labi ng tasang may kape,
hihigupin ko ang init,

titiisin ko ang pait,
hahayaang mapaso ang dila
       nang magising ang diwa
sa pag-antabay at paghihintay
sa ‘di inaasahang bisita;
magnanakaw na ayaw magpakita
        ayaw magparamdam;
at sa pamimintana ng kaluluwa
sa matang durungawan,
sana’y nakangiti akong inaantabayanan
ang pagyayakag mo
         nang tuluyang iwanan
ang materyal na katawan…!
                                   
                                    

10/11/2020

 

LAMBITIN

Bistado ng ngiti

ang tinik sa puso,

lunan ng pagpapanggap

ang lutong ng halakhak -

bulahaw ng namuong agam-agam

sa mata ng kaluluwa -

natigalgal akong 

tinitingala ka,

lalambi-lambiting

unat ang mga paa

09/27/2020

CHAT

 Sinasangkutsa ang utak

ng birtwal na realidad,

walang lutong ang halakhak

sa loob ng group chat...

HAHAHAHA...!

hindi kayang basagin

ang birheng pandinig

ng tawang nababasa lang ng mata!

hindi ko na makita,

pagmamapa ng maraming gatla

sa nababanat mong mukha

kapag ngumiti ka...

wala nang alingawngaw

ang mga salita

sumasagka sa bunganga

ang pinindot na letra

papupurulin ang talim ng dila

hanggang sa mapipi -

talamitang diwa

ng taginting-bungisngis

ng birtwal mo ng mga tawa!

10/01/2020

ZOOM

 'Sing layo ng pagkatuto

ang aking pag-iral,

walang talamitang puso

ang virtual na paglagak

ng talino sa 'king utak.

Kinakapa ng daliri a

ang tiklado ng keypad

habang hinahanap

sa sikmura ng monitor

ang mukhang nilamon

ng pag-aatubili;

otorisadong tinig sa 

aking pandinig

ang pumapatay sa dating 

ingay ng klase;

pinipipi ng mute icon

ang aking kadaldalan,

wala nang halakhakan

wala nang malusog

     na pagtatalamitan

parang hangin lang na dumaan

    ang karunungan.

08/27/2020

SA'YO NA TUMALON MULA SA ROOFTOP NG ISANG EDIPISYO

Sa'yo na tumalon sa mula sa
     rooftop ng isang edipisyo;
nagbutil ng pawis ang noo ko
nang mapanood kang 
     lumagapak ang katawan sa lupa;
lumipad ka sa hangin
nang walang pakpak,
sumisid sa alapaap
bumitiw sa pangarap,
pinaalpas sa palad
     ang bigat ng buhay.

Sinalo ka ng lupa!
lasug-lasog
durug-durog
ang buto mo't katawan;
ano ang huling sigaw
ng pumiglas na utak
habang hinihila ka
     ng puwersa pababao mong?
lantay ang dugo mong
dumilig sa lupa,
pisag-kisay ng katawan
ang huling sulyap ng pagsisisi.

Duwal ng sikmura
     ang gimbal ng kamatayan,
nangalirang ang tuhod
sa dagok ng pagkabigla;
at ano ang nahita
     sa tawag ng pagtakas?
lumipad ka sa langit
nang walang pakpak,
bigat ng lagapak
ang hambalos ng paghahanap ng pag-asa
     kumapit ka sa talim-kalawit
ng pagpugto ng hininga
     dilat ang mata mong
iniwan ang katawan 
at sa balintataw mo'y
'di mo pa rin tangan
     ang iyong kalayaan

02/29/2020